In 2021 stig die Helpende Hand Studietrust die Hier Sal Ek Boer Studiefonds met een groot doel voor oë: Die bevordering en ontwikkeling van die landboubedryf. Hierdie fonds fokus spesifiek daarop om studente te ondersteun wat enige landbourigting aan 'n geakkrediteerde instelling in Suid-Afrika wil studeer.

Die fonds fokus verder daarop om studente uit 'n landbou-agtergrond te ondersteun. Dit sluit studente in wat reeds die uitdagings van droogtes, vloede, peste en plae, plaasaanvalle of plaasmoorde beleef het. Die doel van die fonds is om te verseker dat studiekoste nie nóg 'n struikelblok vir die landbougemeenskap word nie.

Die landboustudente van vandag is die boere en landboukundiges van môre. Om in Suid-Afrika te boer, beteken om vir die dag van môre kos te voorsien, die natuur te bewaar, deur moeilike tye te volhard en vir die volgende geslag te bou.

Die Hier Sal Ek Boer Studiefonds is meer as net 'n bron van finansiële ondersteuning vir studente. Dit is 'n simbool van hoop, deursettingsvermoë en toekomsbou. Dit is 'n uitnodiging aan almal om deel te wees van 'n inisiatief wat nie nét die lewens van individuele studente verander nie, maar ook help om die toekoms van die landboubedryf in Suid-Afrika te vorm. Landbou is ons erfenis; daarom moet ons die boere van môre bemagtig.